Катя но коньдон

Огаз пичигес удмурт гуртын сирота кылем пичи нылаш улэм. Туж вазь анай-атайтэк кылем муртэ ӟеч сюлэмо адямиос ӧз куштэ. Тани нылмурт быдэ вуиз ни. Бызён дырыз но кыдёкын ик ӧвӧл. Солэн туж бадӟым малпанэз вань: вордскем гуртаз вуылыны. Сюлэмыз уйёсы но отчы кыске.

Одӥг нуналэ малпанэз быдэсмиз: со – гуртаз! Отысен ик пумитаз чебер, туж кельшымон егит пиез. Ог-огзылы синмаськизы. Кышнояськизы. Асьсэ понна корка пуктӥзы. Бускельёссы кин маин быгатӥзы, лулысь-сюлмысь юрттӥзы. Кудӥз ыж, мукетыз мешокен пызь сётӥллям егит семьялы. Кӧня ке толэзь ортчыса, соослэн Катя нылзы вордскем. Дыр олокызьы гинэ ортче. Тани Катялы куать арес тырмиз ни. Ог-нуналэ Маша нимо эшеныз соос аспӧртэм шудон малпазы: сяськаез ишкалто, огзылы огзы сэрпалто но чальгес сое кутыны выро. Нылъёслы сяськаен шудон туж кельшиз.

Мукет нуналаз Катя атаезлы шуэ:

- Атай, вай мыным кӧня ке векчи коньдондэ. Ми соосын шудом но выльысь тыныд берыктом.

Атаез нылызлэсь куронзэ быдэстӥз. Катя шумпотыса ульчае шудыны потӥз. Кырым пушказ кырмем векчи уксёез выллане пазьгиз. Соос огез но пыд азяз ӧз усе: огез шуре выйиз, мукетъёсыз возь вылысь нап но кузь тырын пӧлы ышизы. Нылаш кема утчаз соосты – ӧз шедьты.

Катя буш киын, усем мылкыдын гуртаз вуиз. Атаез солэсь юаз:

- Кытын, нылы, коньдонэд?

- Быриз, ӧвӧл ни, - мур лулскиз Катя.

Атаез ӧз куареты, шораз учкиз но шуиз:

- Тынад, нылы, ужан дырыд вуиз кадь. Ас поннад уксё поттыны быгатод ни.

Мукет нуналаз вазь ӵукна ик Катяез уж дораз нуиз. Лумбыт ужаса, ӝытазе гуртазы жадьыса берто.

Огпол атаез нылызлы шуэ:

- Катя, ойдо ай ураме потом, кӧня ке шутэтском, шудом.

Нылыз паймем но шумпотэм атаезлэн верамезлы. Урамысен атаез либыт куараен вазе:

- Кати, вай мыным коньдондэ.

Нылаш ӝик-ӝик бинялтэм коьдонзэ атаезлы сётӥз. Нош соиз, ас понназ мыняса, Катялэсь уксёзэ шуре сэрпалтэм кадь кариз. Нылаш, тае адӟыса, вань кужмысьтыз кеськиз:

- Атай, мар тон кариськод? Со ведь мынам ужам уксёе! Малы шуре куштӥськод?!